काठमाडौं । नेपाल कम्युनिष्ट पार्टी एकता राष्ट्रिय अभियानका संयोजक वामदेव गौतमले तत्कालीन नेकपा हुँदा केपी ओली चाहेको मान्छेलाई प्रधानमन्त्री बनाएर आफू पदबाट राजीनामा दिन तयार रहेको बताएका छन् ।
पार्टीमा चरम विवाद भइरहँदा तत्कालीन अर्का अध्यक्ष पुष्पकमल दाहाल प्रचण्डलाई ओलीले आफूमाथि लगाइएको संगित आरोपहरु फिर्ता लिनुपर्ने र आफू प्रधानमन्त्री छोडेर आफूले रोजेको व्यक्तिलाई प्रधानमन्त्री बनाउनु पर्ने बताएको खुलेको हो ।
शनिबार एक कार्यक्रमलाई सम्बोधन गर्दै उक्त समयको ओली–प्रचण्डको वार्ता खुलासा गरेका हुन् ।
‘उहाँहरुबीच भइरहेको बैठकमा म पनि पुगेको थिएँ । खुमलटारमा अध्यक्ष ओलीले म पार्टी एकता जोगाउन आएको छु । यसका लागि जे पनि गर्न तयार छु । म एउटा पद छाड्न तयार छु । तर मैले भनेको व्यक्तिलाई प्रधानमन्त्री बनाउन तयार छु । जो व्यक्ति हो उहाँलाई जिताएर राष्ट्रिय सभामा लैजाऔँ र उहाँलाई प्रधानमन्त्रीको उम्मेदवार बनाऔँ’, उनले भने ।
सो समय ओलीले आजै सचिवालय बैठक बोलाएर पत्रकार सम्मेलन गरि उक्त विषयको जानकारी गराउन प्रस्ताव गरेको बताएका थिए । त ओलीले आफूमाथि लगाइएको आरोप पत्र फिर्ता लिनुपर्छ भन्ने शर्त राखेका थिए ।
ओलीको प्रस्तावमा अध्यक्ष प्रचण्डले ओके नभनेका कारण पार्टी विभाजन हुन पुगेको गौतमले खुलासा गरेका हुन् ।
प्रचण्डले ओलीमाथि लगाएको आरोप फिर्ता गरेकाे भए पार्टी एकता जोगिने उनको भनाइ थियो ।
