काठमाडौं । राजोपाध्याय समाजको आयोजनामा काठमाडौंको मखनस्थित महिन्द्रेश्वर महादेव परिसरमा पञ्चाभिषेक रूद्री समारोह समापन भएको छ । उपत्यकाका तीनै शहरबाट ३५ जना राजोपाध्याय देव ब्राह्मणहरुबाट पूजा पाठ गरेर पञ्चाभिषेक रूद्री समापन भएको हो ।
१०८ कलश यात्राबाट शुरु गरिएको कार्यक्रममा देव ब्राह्मण ११ जनाबाट लघु रूद्राभिषेक, ९ जनाबाट नवचण्डी, शिव पञ्चाङ्ख पाठ गरिएको थियो । यस्तै, १० हजार संख्याको अयुताहुति यज्ञ पनि गरिएको थियो ।
पञ्चाभिषेक रूद्री समारोहमा संस्कृति पर्यटन तथा नागरिक उड्डयन मन्त्री जीवनराम श्रेष्ठ सहभागी रहेका थिए । मन्त्री श्रेष्ठले काठमाडौंका ओमधरानन्द राजोपाध्यायबाट संकलित कान्तिपुरको रूद्राभिषेक पद्धतीको पुस्तकसमेत सार्वजनिक गरे । पञ्चाभिषेक रूद्री समारोहमा मखन क्लबले सहयोगी संस्थाको भूमिका निर्वाह गरेको थियो ।
साउन १२ गतेदेखि उपत्यकाका तीनवटै शहरहरुको शिवालयमा एकै दिन र एकै समयमा पाँच पाँच जना देव ब्राह्मणहरुबाट पञ्चाभिषेक रूद्रीको सुरुवात गरिएको थियो ।
तस्वीर : आकाश राजोपाध्याय
